(1909) El insultu
Voy cuntar un socedío
que yo mesmu propetario
vi n' el pueblu de Llorío
y é bonu pa un calandario
po lo guapu y divertío.
Saliendo de misa d' ochu.
y llevando muncha xera
por dar de comer al gochu
(con perdón del que me liera,
que soy munchu rudo y tochu),
vi un gran barullu de xente
que tar en rivolición
someyaba cuasimente,
y acerquéme selemente
pa ver aquella custión.
Furando a más non poder,
vi endientro del corro un bultu,
y pude ento's comprender
qu' era una probe muyer
co les ansies d' un insultu.
Igual qu'un perru rabiao
chaba espuma pe la boca;
amparábenla d' un llao
Francisquín el Colorao,
d' otru Lin ed la Maroca.
Entrambos y dos, pulsiando,
quieren despellay les manes:
ella sigue espatuxando
y los sos dientes rucando
como si comiés ablanes.
Los dos homes llevantábenla
coyéndola pel sobaco,
y con juerza ximilgábenla,
y l' un y l' otru afumábenla
con el fumu del tabaco.
Peru la probe muyer
dóblase como civiella,
pudiendo remanecer
y t' a pique de cayer,
que desigüe una costiella.
Un que llaman Perrexil,
que ye ferrador na villa,
y fó aducao en Madrid,
chó aquesti fallu sotil:
"Hay que rompei la cotilla
y les cintes del refaxu
hay que rompeiles tamién,
pa que por riba y por baxu
quede lo mesmo qu'un paxu,
y pueda cercolar bien.
Non la tengáis afogada,
despartaibos d' aquí;
que la sangre esquilibrada
(cuido yo par' entre mi)
pide tar bien ventilada".
Peru á aquella muyerina,
por mal nome la Pimienta,
no i probez la melecina;
retuerse com' una fuina,
y en poco non arrevienta.
Llegó el cura na ocasión
y el que non se denquivoca
siendo cosa de razón,
mando chai sal é na boca
y dai una flotación.
Pero non ameyoró
aquella probe nin miga;
y tan contino apuxó,
que com' un globo s' infló
la caxa de la barriga.
Ya non saben qué facer
al igual mozos que vieyos;
la Pimienta va morrer
y causa estrañidá ver
cómo arremiella los güeyos.
En estu, Pepa la Tuerta,
qu' atuertó diendo a castañes,
y, anque parez que tá muerta,
sabe más que les arañes
y en escurrir munchu apierta,
dixo "¡mil pares de santos
vos valgan!; ¿será el cornín?,
¿non dáis nel quiz siendo tantos,
o caviláis como cantos
en sin ancontrar camín?"
Y descalzando el zapato,
arrimaílo á les ñarices,
y todu aquel arrebato,
y la molición, y el flato
juenon perdiendo raíces.
Facía munchu calor
porque n' el verano yera,
y el zapato, col sudor,
¡ay home! daba un fedor
que p' al diañu que agoliera.
Onde saco yo la cuenta
que per modos tan sotiles
enviveció la Pimienta;
nos entancó muy gafienta
á tapase los cadriles,
sacó tabaco y papel,
fiz' un pito n' un istante,
incorporóse con él,
pidió jueu al redondel
y rompió a andar tan carpante.
Estu ye tan efetivo
que talmente asocedió
lo mesmu que yo l' escribo,
y hay más d' un paisano vivo
que vió el casu como yo.
Siempre y cuando qu'un cristiano,
mayormente de verano,
con un insultu cayés,
el remediu tá na mano...
quier dicise, tá nos pies.